最新消息

Dub Park 2016年特別企劃 Project II
預計4月登場~

 

如你對本堂的節目有任何意見,歡迎用以下方法發表:
留聲堂 Dub Park
電郵:park.dub@gmail.com
網址:http://dubpark.acg.hk/
Facebook 專頁:https://zh-hk.facebook.com/Dubpark
微博:http://weibo.com/DubPark

發表於 最新消息 | 發表迴響

[感謝文] Dub Park 2016年特別企劃:「真•係卡羅斯生日會」

「真.係卡羅斯生日會」噚日喺地球某角落完滿結束,多謝參加嘅堅.自願報名唔係被逼嘅會員好多位;香港專業會場工作人員4位、亞太區專業主持人2位、銀河系專業輔助主持2位、宇宙級專業主廚2位、大會官方指定國家級國寶攝影師1位 (註:以上職位可能會有重覆及純粹自封 + 自high) 同埋最重要「住在深海的大鳳梨裏」嘅嘉賓1位!

今次呢個生日會,堅.已經拖咗好幾年,每年話搞但總會唔知咩原因就係夾唔到搞唔成,所以我哋應承咗嘉賓咁多年都冇做亦都係堅.唔好意思。為咗表達我哋誠心歉意,特別將今次活動定為2016年留聲堂企劃第一彈。

嗱~ 俾哂提示… 有第一彈…即係仲會有第二彈…第三彈…噚日有嚟活動嘅朋友應該都已經知咩事!不過大家就唔好講住,今次係想將呢個秘密講俾你哋聽先。

活動內容同相就依照慣例係唔會公開嘅,除咗要為咗嘉賓嘅立場著想,亦都係要對參加活動嘅朋友公平。各位記住!記住!記住!唔好將噚日活動嘅內容、地點、對話、相…etc. 係網上面公開。呢份同嘉賓一齊創造嘅回憶就留喺大家心入面就好啦~ (咁似廣播劇對白嘅?!XD)

不過,我哋同以前一樣會公開生日蛋糕張圖,俾嚟唔到參加嘅朋友,睇吓我哋個蛋糕有幾好味嘅… (利伸:冇收廣告費)

同場加映首次喺留聲堂活動嘅新節目:「鴨手雞腳廚房」!主演係4位平日喺屋企都唔多幫手煮飯嘅工作人員,竟然親手煮到一煲香港街頭小食 – 咖哩雜丸 + 超甜白蘿蔔出嚟…

真係…不明 + M A G I C…..

呢張喺今次嘅紀念品,多謝小渡小姐嘅仗義相助!巧令令~巧可愛~


最後…希望今次嘅活動唔會令嘉賓同會員朋友失望,新朋友唔好俾我哋幾個原來冇形象嘅工作人員嚇親…(雖然一直都冇形象…)

多謝各位,下次聚會見…
今次我哋真係好開心呀~下次聚會一定更加開心㗎啫~
係咪呀,哈姆太郎?
係咪呀,各位留聲堂嘅朋友?

 

瘋狂hashtag時間:

# 原來各位都會想睇現場廣播劇,小編會開始鞭策編劇們交稿,下次一定有。
# 各位都有聽留聲語,令到我哋好滾動~好滾動~好滾動~
# 簽名嘅時候,握手好啦~唔准抱抱!最多你好似台灣歌星咁買5張CD就可以抱抱… (明明我哋冇嘢賣…)
# 工作人員表示我哋都唔記得同嘉賓握手…(淚奔)
# 唔好再問平日同你哋傾計嘅小編J、小編Z 、小編K、小編F同小編C係邊個…我只係知最後3個加埋變咗小編KFC…(再次利伸:冇收廣告費)
# 唔好再問龍哥係邊個,佢搞好韓國啲JOB就會返嚟,佢都好想盡快安排同大家見面,但你哋都知佢又就嚟要當兵,係忙啲…
# 真心跪求各位填活動問卷,我哋先知下次點做會更好。
# 又到小編JZKFC休息嘅時間,不過留聲堂專頁依然仍然自然會繼續更新,仲會進入「歲月留聲」模式,務求令各位一直係咁loop,係咁睇重播。
# 如果睇唔明點解嘉賓會係「住在深海的大鳳梨裏」,請自行googoo 。

發表於 2016年, 留聲活動 | 發表迴響

Dub Park 2016年特別企劃:「真•係卡羅斯生日會」

我哋成日都講我哋有睇你哋嘅留言,你哋問過幾時有活動嘛…

收到啦~收到啦~
之前話有消息會秒速同你哋講,
得啦~得啦~
而家咪講你知囉!

Dub Park 2016年特別企劃…
咦~好似好耐冇打過呢句!
唔理啦~一次過講哂啦!

Dub Park 2016年特別企劃:

真 • 係 卡 羅 斯 生 日 

日期: 28 February 2016 (Sun)
時間: 1400 – 1800 (4 hours)
地點: 觀塘某地方(詳細地址只會俾參加者知)
收費:
(A) HK$250 – 全場劃一收費,冇分A區搖滾區、B區電視區或者C區山頂區…
(B) HK$230 – 呢個係俾出示到有效學生證嘅全日制學生優惠價,過期學生證唔收,仲有其他咩身份證、回鄉證、圖書證…全部都唔得呀!但如果有長者卡就…請另行聯絡小編…

報名方法:請填寫以下報名表,之後再用電郵方式提交至park.dub@gmail.com

如果你留聲堂討論區登記咗嘅會員:
電郵標題:「真•係卡羅斯生日會」報名表@(你的論壇名字)
電郵內容請填寫:
- 於留聲堂的論壇名字 :
- 你的真實姓名: Mr. / Ms.
- 聯絡電話:
- 聯絡電郵:
- 是否持有效學生證之全日制學生: YES / NO

(2) 如果你唔係留聲堂討論區登記咗嘅會員:
電郵標題:「真•係卡羅斯生日會」報名表@(你的名字)
- 電郵內容:
- 你的真實姓名: Mr. / Ms.
- 聯絡電話:
- 聯絡電郵:
- 是否持有效學生證之全日制學生: YES / NO

今次活動嘅參加方法有新安排,我哋想俾一啲聽完Talk of Dub Park之後先識留聲堂嘅朋友,都嚟參加吓我哋嘅活動。不過,已經喺留聲堂討論區登記咗嘅會員朋友,請放心,我哋會以會員嘅福利行先,你哋會優先得到參加活動嘅資格。

❤ 請各位多多支持留聲堂2016年嘅第一個活動呀~期待同你哋見面! ❤

請注意:
(1)有興趣活動參加嘅朋友,請喺 18/01/2016(一) 至 24/01/2016(日) 期間依格式用電郵提交報名表,截址後,就唯有下次請早。

(2)而家只係報名階段,暫時唔會收錢,報咗名嘅朋友會喺25/01/2016(一)分批收到「繳費email」,到時跟住內容寫嘅資料去做就得啦。

(3)有咩問題想問,歡迎喺留聲堂討論區嘅活動專帖,Facebook專頁或者官方微博查詢。

(4)本活動所有最終決定權歸Dub Park 留聲堂 – 堂主及幹事所有。

 

* 由即日至31/01/2016,留聲堂將會停止收新會員以示公平。不便之處,敬請原諒。*

發表於 2016年, 留聲活動 | 發表迴響

《Talk of Dub Park 留聲語 》 總結感想 – 龍哥篇

睇倒大家都好想知我嘅真實身份,曾經有一刻真係有諗過公開,但最後決定都冇,原因係因為我覺得我係邊個唔重要,最重要係節目嘅內容大家有冇共鳴,有冇得倒一啲對配音呢個行業嘅睇法同知識。

另外好開心今次可以同留聲堂入面一班對配音咁有熱誠、咁有堅持嘅人合作,其實咁多集大家嘅留言我都有逐個逐個去睇,反應比我想像中好,我諗呢個應該係對我哋一個好大嘅鼓勵。不過有讚一定都有彈,我比較唔開心嘅係睇倒啲留言話節目內容或者嘉賓唔係自己想聽嘅,話浪費咗佢嘅時間,大家不妨退後一步諗下,我哋大可以唔搞呢個節目…

同一個道理,配音員唔係自己喜愛嘅聲音/演繹,就選擇去攻擊佢,有批評當然係好事,但當中嘅努力同心機更需要大家嘅鼓勵同包容,我相信客觀性嘅思考比主觀性嘅批評更可以令配音員、留聲堂進步。

多謝大家13集嘅支持,相信好快我哋會再見!

祝大家新年快樂!

龍哥

發表於 留聲語, 節目後感 | 發表迴響

《Talk of Dub Park 留聲語 》 總結感想 – Fanny篇

要持久去做一個節目並不容易,好吧,簡單來說就是因為土地問題。

今次機緣巧合下去申請社區參與廣播計劃,嘩…留聲堂有節目在大眾媒體播出,好威威呀~
申請過程到節目播出期間的每一個範疇都是一個好好的經驗,
對於配音迷來說,配音相關的東西可以滔滔不絕的說 ;
對於普通的聽眾來說,果真要花點時間去讓他們了解。

也許大家會嫌嘉賓不是心目中的配音員,但每位嘉賓的經歷跟故事,都有啟發性同思考的地方。
也許大家覺得節目的時間太短,不夠盡興, 因為這不是網台,但不知大家有沒有發現主持們的技巧因而提升了?有些事情果然要逼出來的~XD
也許大家發現我經常公器私用的幫張敬軒先生打歌…哈哈哈

另外,要多謝編劇寫了那麼多很好的故事~
說真的…我其實挺怕做廣播劇(零演技)…
不過慢慢的放棄自療,就會發現其實很好玩。

留聲語完結了~

就讓我休息一陣子吧(梳乎蛋MODE) ,
休息是為了走更長的路,
不用太擔心,DAISY 已經幫大家爭取了好福利,
請密切留意~

#在空檔的時間,大家可以去聽一下<發條象之翼>的廣播劇。(無處不在的廣告…哈哈哈哈)
#關於龍哥的事…其實…我真的不太清楚…

發表於 留聲語, 節目後感 | 發表迴響

《Talk of Dub Park 留聲語 》 總結感想 – Kelvin篇

大家好,終於到我出場喇,我係Kelvin 呀。

Dub Park留聲堂之榮譽巨獻之聲朋俱樂部free之社區參與廣播服務試驗計劃之第十季之陪你去看之留聲語,終於都完滿結束。

13集,話短唔短,話長唔長,雖然大家收聽嘅時候可能只係13集,每集1個小時,但係其實我哋台前幕後 (雖然台前幕後都喺得我哋幾丁友);前後花咗超過一年時間,由報名、面試、揾嘉賓、揾嘉賓幫手揾嘉賓、正式錄音、同某大台商討、跟mixing、處理文件。喺一定嘅框架下,可能未必係最好嘅一季,但係我哋一定係盡咗最大努力(細聲:仲喺好艱辛嗰隻,你明啦)。

無所事事嘅Kelvin 喺高X呀、X登呀、面書呀、仲有其他網上平台都見到有啲聽眾話「呢季咁短㗎?」「成日播歌!」「點解無T_B配音員?枉我集集等」。由於今次係喺一個正式嘅電台正式咁播出,變相就多咗好多制肘同固定格式,而呢啲唔係我哋小薯仔堅持下就改變到,同時唔可以話搭下膊頭就邀請到台入面嘅配音員,不過見到有巴打喺網上幫我哋抱不平,本方丈都老懷安慰…

但換個角度諗,今次都可以話係有一個機會可以俾大家更加認識一班自由身嘅配音員,呢樣都係我哋希望可以做到嘅目標,你話我hard sell都好,我都要一而再~再而三~苦口婆心咁講多次,自由身配音員真係好需要大家欣賞、支持同善意批評,因為多一句惡意評擊,電視台就會多一個cut budget甚至唔配音嘅借口。

好喇,終於講完啲連我自己都覺得「噚」嘅嘢(你不嬲都長氣㗎啦),係時候講下得獎感受,吖唔係,係感謝嘅說話,以下排名不分先後:多謝災時姐~啦(請腦補個字fort size48+粗體),佢喺我個腦一片空白嘅時候用佢天籟一般嘅美妙笑聲,幫我炒熟個嘉賓,吖!應該炒熱個氣氛。多謝Fanny啦,cos住sailor Pluto 提我仲有多分鐘要埋尾。多謝CaCa同Zero,寫咁多好劇本俾我哋,而且俾我嘅角色都好有發揮,俾我過足戲癮。多謝霧遙啦,幫我哋揾到好多嘉賓同幫我問啲好有深度嘅問題。當然仲有我哋好神秘,謎一般嘅龍哥,佢特登遠道由泡菜國飛嚟同小弟做節目,有佢真係生sick不少。

另外仲有我哋一班聽眾,不論你係扭錯台、聽得一集半集、定係話難聽又聽足13集,我都好多謝你花時間聽我發噏瘋同鍊把死人聲扮靚仔(雖然真人真係~嘔),而且俾咗唔少評價,有好有壞,我全部都有睇同反省,好嘅當然好啦,但壞嘅都更好,因為有人肯話我知我有咩不足係好難嘅得事,等我知道有咩改善空間。

最後就係多謝一班嘉賓,每一集完嘅時候我講多謝都係好衷心,佢地真係抽時間,唔接工作,嚟同我哋呢班唔知乜水發癲,又要除鞋又要做廣播劇又要等嗰個Kel乜vin NG,而且仲講咗好多八卦嘢(正經呀!),而且仲講好多呢行嘅生存之道同配音上一啲好有用嘅技巧。

真係到最後喇,希望呢季留聲語你哋都會聽得開心,將來再睇吓有咩機會、用咩型式同大家見面啦,如果將來有緣喺電視或者網上其他地方聽到我把聲甚至見到我,記得話我知喇,有你哋支持,希望將來我會由一隻棋磨練成一個真正而且獨當一面嘅配音員,可以將佢變成我嘅工作!

祝大家聽完留聲語,有美好嘅新一年啦!

KELVIN
春 2015,吖唔係,寫過
春 2016

發表於 留聲語, 節目後感 | 發表迴響

《Talk of Dub Park 留聲語 》 總結感想 – CaCa篇

做完啦…

係… 13集嘅Talk Dub播完啦…

要打感想…唔…講咩好呢?點講好呢?

等我諗諗先…ก็ʕ•͡ᴥ•ʔ ก้

好~其實因為我想講嘅嘢好多,所以都唔知由邊度講起好…唯有分幾個重點慢慢講…如果以下內容太多嘅,官方提議各位分2日睇,但唔好唔睇,我打咗好耐㗎!(〒︿〒)

 

之前有一次感想講過,每件事都會有一定嘅「遊戲規則」,當我哋唔係主辦,而join咗人哋嘅活動,我哋就要跟對方嘅「規則」。為咗呢個節目,有啲事其實我哋有努力過,一次唔得,再試,再唔得,再繼續試…總之都用咗好多方法,試咗好多次…但最後嘅結局都係唔到最完美。或者我哋將呢啲事實講咗出嚟,好多問題就會有答案,亦都可以解釋到我哋點解會咁做?點解冇咁做?

「針無兩頭利」,我哋得到嘅嘢會比以前多,但同時我哋要失去嘅嘢亦都唔少… 但為咗尊重今次嘅節目,就咁啦… 唔再多講啦…(´-ι_-`) 不過我知道尊重同喜愛我哋節目嘅朋友,會理解我哋嘅。點都好…我覺得今次都係一個好好嘅經驗,我哋唔會後悔去參加呢次活動,對於做人處事、團體合作都有新得著。套用一句:「我哋真係學咗好多嘢!」

 

(*ˇωˇ*) 跟著落嚟就係一堆打從心底嘅多謝(*ˇωˇ*)

嘉賓嘛…首先要多謝三位,5pm、Alex同阿英,Talk Dub嘅每集嘉賓,都係由呢三位介紹俾我哋。特別係Alex,成輯Talk Dub 2/3嘅嘉賓都係佢落力介紹!ヽ(・×・´)ゞ 之後就梗係多謝每集上嚟嘅嘉賓啦~冇佢哋,就唔會有呢個節目。

想同Fanny,Joyce姐、Kelvin、Zero、霧遙、龍哥講多謝,因為Talk Dub就係由呢班人煉成…成員們喺成個project入面都冇計較過自己做多定做少,邊個唔得閒嘅就即刻有人補上,大家都只喺想個節目好,交得出一個對得人、對得住自己嘅Talk Dub俾聽眾。另外多謝兩位隱藏版人士,就係魚姐同Elaine出手相助,魚姐畫咗邀請卡同感謝卡俾我哋,等我哋可以送俾嘉賓;仲有Elaine,冇佢,Talk Dub唔會有個咁靚嘅節目logo。

關於呢個節目,個人嚟講最深刻就係廣播劇… 可以有一個平台俾我寫故事,之後仲可以交俾一班高手前輩嚟聲演!我覺得Talk Dub呢個節目,一次過已經將我喺2015年嘅人品用哂…(゚3゚)~♪ 每個故事未必係最完美,但呢9個小故事,最希望聽眾聽完會有9個唔同嘅感覺、唔同嘅感動、唔同嘅回憶…同埋感受到嘉賓強大嘅表演功力~~~~~~

講開廣播劇要提Kelvin~提Kelvin~提Kelvin~(好重要,所以要講3次)。錄一個劇可能1個鐘頭內就會完,但後期製作要剪走NG,加BGM,再加上只有喺公餘時間先可以做,又要趕deadline… 兩個字:「辛苦哂~天使Kelvin~」*ଘ(੭*ˊᵕˋ)੭* ੈ✩‧₊˚

Zero嘅劇都好好笑,我做咗2次主要角色都係做佢嘅劇,印象最深喺第9集嘅女同事… 自認高富帥男神煩膠同事真係好正,當時我係真心想打飛呢個男同事~(☄◣ω◢)☄

至於聲演廣播劇同主持功力,我知道我哋幾位主持都有好大嘅進步空間,每一次做節目經驗嘅都會係進步嘅原料,我哋會努力去改善呢啲問題。

 

平日大家嘅留言呢…我哋真係每一個都有睇,所以知你哋想問…( ´థ౪థ)σ

「留聲堂喺2016年會做啲咩…」

第一…就梗係放假先啦~2014年11月因為Talk Dub到而家我哋都未放過假!( ´•̥̥̥ω•̥̥̥` )俾小小時間我哋休息吓~睇吓配音劇~睇吓配音動畫先… 我哋就嚟連PARK把聲係點都唔記得啦… 等我哋update吓自己個database先,如果唔係下次見到你哋,大家講幾位新嘅配音員,我哋都唔知係邊個…

第二… <Talk of Dub Park> 或者<聲朋俱樂部>有冇下一輯…呢個問題,現階段答唔到…只可以答「有緣再見」~每次節目完,我哋都會講呢句,因為呢個係事實。每一個節目嘅出現真係要「天時、地利、人和」嘅配合,少一個因素都唔會成事,我都好希望可以再有呢下一次嘅緣份。٩(。・ω・。)و

第三… Fans Meeting… 呢個答到… 係有咁嘅打算,不過幾時、咩形式、咩嘉賓全部未定… 因為2015年完全未搞過聚會,今年我哋都想同嘉賓一齊玩吓,聽佢哋嘅分享;另外同大家見吓面,親身聽吓大家對留聲堂或者Talk Dub嘅意見。FM嘅問題,就等我哋放完假再開會傾傾先…一有消息就秒速公佈。

第四…預告一件事…話說有一日特務小編又喺「留聲堂Secret Garden」搵到一份好重要嘅文件,上面又寫住Top Sercet…

其實成日講「留聲堂Secret Garden」… 真實係喺邊…?

可能係呢度…

*「留聲堂Secret Garden」想像圖

是但啦~我都唔知點解特務小篇成日都可以咁得閒喺花園到搵到文件…平日叫佢做嘢又唔見人…(#`皿´) 總之,2016年嘅某一日,我哋咁多位主持每個人都應該會用一個全新嘅身份、全新嘅名去同大家見面~到時記得支持吓!絕對會有驚喜!(✪ω✪)

 

就寫到呢度先啦~再寫真係會變論文…

最後要多謝(´▽`ʃ♡ƪ) 留聲堂嘅朋友,同埋因為Talk Dub而認識我哋嘅新朋友,對留聲堂一直嘅支持同埋鼓勵,你哋嘅心意,我哋係200%感受到。雖然唔知道將來留聲堂會點,都希望你哋會繼續留底,一齊支持香港嘅配音,令更多人可以認識到呢個香港嘅專有表演文化。

同時亦都希望支持香港配音嘅朋友,喺支持某台配音員嘅同時,亦都希望你哋可以支持某台以外嘅配音員,喺訪問過程中我哋感受到佢哋對配音嘅熱情、喜愛同動力唔會少。不妨花少少時間去認識吓佢哋,或者會搵到某台之外你鍾意嘅配音男神女神高人呢~d(`・∀・)b

2016年~

遲來的Happy New Year !  ε٩(๑> ₃ <)۶з

今年…

繼續多多指教!

 

By 2015年用哂所有人品嘅CaCa ╮(╯∀╰)╭

發表於 留聲語, 節目後感 | 發表迴響

《Talk of Dub Park 留聲語 》 總結感想 – Joyce篇

可唔可以話俾我知點解我叫Joyce 姐?典解嘅典解嘅典解嘅! Σ(lliд゚ノ)ノ

多謝有份做<留聲語>呢份Project 嘅每一位,包括介紹嘉賓俾我哋嘅NPM、Alex同埋阿英,接受訪問嘅嘉賓們,留聲堂嘅咁多位對我嘅特別包容…你哋知啦,我無嘢叻,淨係識得chur 人(́=◞౪◟=‵)。祭壇錄音室嘅負責人們,佢哋真係超好, 遷就我哋就嚟去到不能再遷就嘅地步…

當初決定做呢個Project 嘅時候,我哋有宣傳過,之後靜咗,你哋嘅留言我哋係想逐一同你哋講,我哋係知道,亦都深同感受。好多嘢我好想係度講底,RTHK 嘅工作人員一直同我嘅作出”良好”嘅溝通,令到我哋知道做運動嘅重要性… 由於模式唔同咗,要重新適應一啲「規則」問題,你哋冰雪聰明,會明白! ヾ(◎´・ω・`)ノ 再次感謝你哋嘅投票,令到我哋有返信心去做呢個Project!!!

但真係要同大家講唔好意思,感激大家對我哋嘅包容加手下留情,意見係收到,如果有下次,我相信吸收以往既經驗,大家會做得更好!做呢個Project 係唔開心多個開心嘅~~唔開心嘅係對方嘅「規則」問題,我哋咁多人都唔係好明個「規則」點玩,包括第一集嘅嘉賓明明係我哋,咩都搞好晒,但到出街就唔知點解去到第7集先到我哋~我哋係差唔多全部人都GG哂…(°ཀ°)

令我喜出望外嘅就係留聲劇場~~~每一集嘅劇本大家用輕鬆心態去寫個故事,點知出到嚟會共鳴啦~中毒啦等等~多謝嘉賓們嘅加攻演出…為我們疲倦嘅身心帶嚟一啲良藥…

做完呢個Project,可唔可以俾我哋休息下先? 。:.゚ヽ(*´∀`)ノ゚.:。

係咁Chur,再鋒利嘅刀都有生銹嘅一日啦…今年我想有生日會呀~FM 呀~堂主~可唔可以有呢啲活動呀? (♛‿♛) 不過,我有預感…半年內留聲堂一定會有啲嘢俾大家嘅!呵呵ψ(`∇´)ψ

By Joyce

#終於完左一個Project 喇
#俾我地唞下啦
#我地唔識射波
#廣播劇真係好好玩
#做呢個Project 係鍛鍊耐性同EQ
#龍哥就係DG
#龍哥係一個普通人
#留聲堂咁多位辛苦晒
#好戲再後頭

發表於 留聲語, 節目後感 | 發表迴響

《Talk of Dub Park 留聲語 》 總結感想 – Zero編

發表於 留聲語, 節目後感 | 發表迴響

《Talk of Dub Park 留聲語 》 第十三集 主持後感

嚟到<Talk of Dub Park>最後一集,嘉賓繼續喺正斗黃鳳英小姐~

訪問嘅過程因為都會觸及到一啲正經話題,阿英都會好用心咁樣解答同講解,令到我哋可以學到同知到好多嘢。而咪後嘅阿英,其實佢本人係好玩得,特別係同佢最後完哂訪問之後影相嘅時候,影出嚟每張阿英嘅pose都好可愛!

另外仲要多謝阿英,如果唔係因為佢,我哋都唔可以野生捕捉到黑長直女神做訪問。事源就喺訪問當日,我哋問阿英有冇嘉賓可以介紹俾我哋,咁啱阿英就同黑長直女神whatapps緊,於是佢就問我哋想唔想訪問黑長直女神…

我哋就梗係要把握機會啦~於是就成功促成咗訪問黑長直女神嘅呢件事啦…

 

好啦…講到呢度…

13集嘅<Talk of Dub Park>已經完哂,好多謝各位嘅支持!對於呢個節目嘅感想同埋留聲堂未來嘅方向,好似會唔會有下一季?會唔會有聚會活動?… 就交噃俾咁多位主持各自講吓。大家要留意各位主持寫嘅內容,睇吓從中會唔會搵到啲你哋想知道嘅線索!

有緣再見

By 留聲語好多好多好多主持人

發表於 留聲語, 節目後感 | 發表迴響

《Talk of Dub Park 留聲語 》 第十三集重溫:黃鳳英(下)

<Talk of Dub Park 留聲語>第十三集最終回
「淺談配音業的過去、現在和未來」

承接上一集,今集嘉賓繼續有請黃鳳英小姐。

嘉賓&留聲語成員最後一次同大家嘅約會…
3個月,13集,13小時,780分鐘,46800秒,
依然承諾只會準時,不會遲到。

主持:Kelvin、Joyce
協力:CaCa、Fanny、Zero、龍哥、霧遙
資料搜集及編寫:Joyce、CaCa、Fanny
首播日期:07 – 01 – 2016 (四) 2100-2200
播放頻道:香港電台數碼31台

官方重溫:
Talk of Dub Park:第13集_Part 1
Talk of Dub Park:第13集_Part 2

發表於 每集重溫, 留聲語 | 發表迴響